ظلل الجزء الغير واضح
1- الكذب الأبيض : ** يسمونه الكذب الأبيض علشان لا يأتى من ورائه أى أضرار ومثال لذلك نحن جميعاأعضاء المنتدى الكرام ، مفيش واحد فينا قال أسمه الحقيقى كله بيكذب على كله ولكن هذا الكذب لم ينتج عنه ضرر وربما يكون له فوائده أحيانا .
** أطفالنا الصغيرين الأمامير عندما يأتى أحدهم بفعل أو تصرف يستشعرونه خاطىء فتجدهم بتلقائية بريئة
ينكرونه خوفا من العقاب .
** الحبيب وحبيبته أذا تأخر أحدهما على موعد الأخر بعض الوقت يأتى بحجج واهية لا أساس لها من الصحة
وكذلك الطرف الثانى يدعى أنه تقبل العذر وهو يرفضه فى داخله وربما يكون هو الأخر قد جاء متأخر عن الموعد (( تجده لسه واصل حالا )) ويقول أنا هنا من قبل الميعاد بساعتين ، أنا من امبارح ما نمتش طول الليل بأستعجل الشمس تطلع علشان أشوفك يا حبيبى وأنت ولا على بالك . .. . ويسموه الكذب الأبيض
2- الكذب البمبى : ** الحبيب يقول لحبيبته ، أو العكس ( أنت روحى) ( أنت عمرى ) ( أنت عينى اللى بشوف بيها الدنيا اللى بقت أحلى من يوم ما عرفتك) (طول الليل وانت معايا فى أحلامى ) ( ياأحلى من حياتى .. وأغلى من عينيه ) ( لو شقيت قلبى نصين حتلاقى صورتك محفورة جواه ) ( أنا عمرى أبتدى من يوم ما عرفتك )
كلها أشتغالات ......................... > فيلم ** عيال حبيبة **3-
الكذب الرمادى : ** بتسأل حبيب القلب ( مالك هفتان كدة وصحتك فى النازل ) ، ( بقى لك فترة شكلك مش عاجبنى ) ويرد عليها (( من كتر التفكير فيكى ياروحى لا عارف أكل ولا أنام )) والحقيقة حاجة من أتنين 1- أبوه كرشه من البيت ومانع عنه المصروف 2- بيحب واحدة تانية بجد .
4- الكذب الأحمر ** لما يقابلها وهى ماشية مع واحد تانى أنكاجيه وسايحين ونايحين مع بعض على الأخر ويسألها مين اللى ماشى معاكى ده ؟ تقوله .. دا أبن عمى ولا أبن خالى ثم أنت مال أهلك أنت تعرفنى أصلا .. أيه التلاقيح دى .
وبعد ما تسيب المصلحة اللى كان معاها ترن عليه وهو يجرى المسكين يطلبها على الموبايل وتقوله ............. معلهش كان لازم أعمل كدة علشان أبن عمى ميعرفش حاجة عن علاقتنا أصله بيحبنى وعايز يتقدملى وأنت قاعد أيدك فى ميه باردة ... أنا خايفة على حبنا أوى أنت حتيجى تتقدم لبابا أمتى (( وتلاقيها قالت نفس الكلام للتانى )) والمسكين يصدق ويسامح ... ولو أتهف فى مخه وراح يتقدم لأبوها يلاقى ملهاش ولا أبن عم ولا أبن خال ولا ليها عيلة أصلا ومقطوعين من شجرة ولا يمكن يكون عليهم تار وهاربانين منه ..
5- الكذب الأصفر ** الزوجة الأولى لما يرجع سبع البرمبة من الشغل تقوله على الزوجة الجديدة (( بسلامتها طول النهار وقفة فى البلكونة بقميص النوم وأبن الجيران واقف فى الشباك )) .... يدخل عليها أبو الرجالة بهم طافح ومعاه شومة ولا سكينة وهو بيقول ( الشرف غالى ) تقوم تقابلة ست الحسن والجمال والدلال الحلوة النغشة وهى بتنكى بكاء مصطنعا وتأخذه فى حضنها وتحط راسها على صدره أهه أهه أهه أهه مراتك الأولنية يارجلى يادهرى يا لى ماليش غيرك فى الدنيا طول النهار منكد على عيشتة ومخرتش بره باب الأوضة مستنياك تأخدى حقى دى ست مفترية وبتغير منى علشان أنا صغيرة وأحلى منها وكل ما تسمعنا بنضحك مع بعض بتفلفل من
وينتهى الموضوع بعد كدة متسمعش غير ضحك وصهللة ويخرج أبو الرجالة يطلع همه فى الزوجة الأولى .. والتانية واقفة تتفرج وتضحك وتقولها هو .. لو كنت عششتى على طيرك ماكانش لاف على غيرك ....
6- الكذب الموف ** وهو نوع من الكذب الخفى كذب مع النفس وأحيانا يشتمل على بعض المجاملات خد عندك مثال (( وردة البنفسج تقول للفل أنت أجمل وردة فى البستان كله )) .. الزوجة لحماتها (( منورة الدنيا كلها يا حماتى )) وفى سرها ( ربنا يخدك ويريحنا منك ) الحماة لزوجة أبنها (( لسانك بينقط سكر يا حبيبتى )) وفى سرها ( جاتك نيلة وأنت عاملة زى العقربة بلسان حية ) الأم لأبنها أمام مراته (( مراتك دى حتة جوهرة بت أصول بصحيح )) بعيد عن مراته ( أنا عارفة أنت متحملها أزاى الست دى ) .. ( ربنا ياأبنى يصبرك عليها ) وبعد مغادرة الأم منزل أبنها وراته تقوله (( ياساتر .. الحمد لله .. بلوة وأنزاحت ..)) وهو بسلامته وأسم الله عليه وأسم النبى حارسة وصاينه مرغم يقول لكل واحدة على حدة ( أه والله عندك حق ) .
7- الكذب الأخضر
** تخيل معى رجل يسمى عصفور وزوجتة تسمى جرادة يعيشون فى ضنك العيش حيث يعمل عصفور باليومية ( يعمل يوما ويجلس فى البيت أسبوع بلا عمل ) فأشارت غليه جرادة أن يتركون هذة البلدة ويهاجرون الى بلدة أخرى وجمعوا حاجياتهم ورحلوا هائمين فى البلاد حتى أجهدهم العناء وأستقر بهم المقام فى أحدى البلدان وقالت جرادة لعصفور جرب شغلانة ضرب الودع وأبين زين أبين يمكن ربنا يفتح علينا ورد عليها عصفور أنه لا يجيد هذا العمل فقالت له جرادة دى حاجة بسيطة خالص ( لو قابلك حد كبير وشايفه مكشر) قوله يوجد فى مشكلة وليك أعداء متربصين بيك بس ربنا حينصرك عليهم وأن جايلك الفرج قريب على بعد خطوتين ... يمكن يومين أو أسبوعين أو شهرين أو سنتين أو قرنين من الزمان ..
أما أذا قابلت شاب أو صبية قول أى كلام فى الحب والمستقبل والحاجات دى بتفرح الشباب وأن شاء الله ربنا راح يفتح عليك .
أستهوته الفكرة وجهز عدة الشغل وسار فى شوارع البلدة ينادى ( أضرب الودع وأبين زين ) . ، . وفى هذه الأثناء كان يجلس عمدة البلد مع أحد أصدقائه أمام الدوار يقول له أيه رأيك لو نصطاد عصافير ونادى العمدة وأحضروا له عود من الصمغ وأتوا اليه بجرادة (( نوع من الحشرات يسيل لها لعاب العصافير ) وقام العمدة بلصق الجرادة على عود الصمغ وغرس العود فى الأرض على بعد خطوات منه وما هى ال لحظات بسيطة ونزل عصفور ليلتقط الجرادة والتصق هو الأخر بعود الصمغ وفرح العمدة بهذا المشهد وحينما سمع رجلا ينادى على الودع فقال لازم نعمل له أختبار أن صح كلامه فله عندى بيت وأن كذب طالعة أمرت بسجنه وأحضر ملايه وغطى بها الطائر والجرادة ونادى على الرجل وأجلسه أمامه وقال له ما نوى عليه العمدة وسئله أذا عرفت ما هو الشىء الموجود أسفل الملاية وكيف أتي فلك بيتا عندى وأن لم تعرف فلك السجن .... وأحتار الرجل فى أمره وتذكر زوجته وأبناءه ووضع يده على خده يندب حظه ويلعن ما أشارت به زوجته ويقول فى سره ( أدى أخرة اللى يمشى وراء الحريم) وأدرك أنه داخل السجن لا محال وتمتم بكلمات غير مفهومه ثم قال (( لولا جرادة ما وقع عصفور )) فصاح العمدة وقال له صدقت لك البيت والغذاء اليوم عندى أنت وأسرتك وأعطاه أربعين زوجا من الدجاج هدية له.، طار عصفور من الفرح وأتى بأسرته وأقام فى البيت وفى ذات يوم أرسل اليه العمدة يستدعيه وقال له أن عصابة كبيرة قد سرقت خزنتى وبها مبالغ كبيرة فأذا أتيت بهذة العصابة فلك نصف ما فى الخزينة وأذا أتيت بالخزينة فقط فلك عشر مابها (( أمامك أسبوع فقط والا أمرت بقطع رأسك )) وعاد عصفور الى بيته حزين وقال لزوجته ليس امامنا فى هذه البلدة سوى خمسة أيام فقط وسوف نرحل من هنا وننفد بجلدنا وقص عليها الحكاية وقال لها كل يوم تدبحى جوز فراخ خلينا نلحق نأكل منهم قبل ما نرحل من هنا وفى ذات الوقت وصل الخبر للعصابة وتخوفت من أن يكتشف أمرها فأرسل زعيم عصابة الأربعين حرامى أثنين من العصابة للتصنت على عصفور وتقصى الأمر وحينما أقتربا من البيت كان عصفور قد أنتهى من دبح جوز فراخ فسمعه الرجلين وهو يقول آدى أول جوز من الأربعين ففروا مهرولين الى الزعيم الذى لم يصدق ما سمعه ، وفى اليوم التالى أرسل أثنين غيرهم وتكرر نفس الموقف وقد أصر زعيم العصابة على الذهاب بنفسه وفى اليوم التالى دخل عصفور عشة الفراخ ليمسك منهم من هو عليه الدور فأذا بديك كبير يطير فى وجه عصفور فأمسك به وهو يقول وأدى كبيرهم زعيم العصابة ، فعندما سمع زعيم العصابة هذا الكلام فذهب وأتى بالخزينة وأعطاها لعصفور كما هى بعد أن وعده عصفور بالا يذكر أسمه عند العمدة وحمل عصفور الخزينة وذهب بها الى العمدة وأخذ عشر ما بها ثم أخذ أولادة وزوجته ورجع الى بيته القديم وقد أشترى أرض وأخذ يزرعها من الأموال التى أعطاه أياها العمدة وقد حصل عليها بالخداع والنصب والتحايل ولذلك يسمونه الكذب الأخضر ..
8- الكذب النبيتى ** الأنسة جيجى مخطوبة وماشية على حل شعرها مع شلة النادى والجامعة ولما ترجع متأخرة من برة مفيش حسيب ولا رقيب الأم بس هى اللى عارفة كل حاجة ولما تصادف مرة وهى راجعة وتلاقى بابا سهران لسه فى البيت ويسألها كنت فين يابنتى لحد الفجر تر وبكل ثقة كنت بنذاكر مع واحدة صحبتى باباها عنده معمل وكنا بنذاكر عملى وحضرتك عارف الكيمياء محتاجة عملى أكتر منها نظرى والأحياء كله الا الأحياء يابابا دى بقى اللى محتاجة عملى بجد وهو يعينى حتى ميعرفش يعنى أيه أحياء غير أن الأحياء أبقى من الأموات وترد الأم أيه ياراجل البنت راجعة من المذاكرة تعبان يعين أمها وعايزة ترتاح علشان بكرة عندها عملى تانى وبعدين أنا مش قلت لك أنا أتصلت بيها عند سوزى أكتر من عشرة مرات تقريبا كل نص ساعة علشان نطمئن عليها ونفس الكلام تقوله لخطيبها طبعا لما ييجى يسأل عليها وميلاقيهاش فى البيت ( عادى يعنى ) وجيجى عايشة حياتها مع الشلة شرب ورقص وسرمحة وتعمل أحسنها دماغ وتعيش فى التوهان ولا تدرى بنفسها الا وهى نايمة على السرير وفى حاجات أحمرة على ملابسها الداخلية المتناثرة فى أنحاء شقة سوزى وحاجات أصفرة باقية فى الكئوس عقاب شرب ورقص وفرفشة والله عليها الأحياء وبكدة تبقى صاحبتنا راحت فى الكازوزة ، وترجع الست الوالدة تقولها ولا يهمك كل حاجة ولها حل وتقول للحاج صاحب البيت الله يعمر بيته أصلها هفتانه يعنى من كتر المذاكرة والتعب والسهر لا ياحاج اوعاك عقلك يروح لبعيد أنا واثقة من بنتى كويس قوى أما عن الموبايل فهى محوشه ثمنه من مصروفها وأذا كان على اللبس ده أصحابها هدوها بيه فى عيد ميلادها وهكذا تستمر الأم والبنت فى الأكاذيب حتى نصل الى اللون البنى والأســـــــــــــــود
.
9- الكذب البنى : ** أقتربت ليلة زفاف جيجى وأصطحبتها الست ماما الى عيادة أحد الأطباء اللى فهمته أن البنت وقعت على زجاجة كوكا كولا وان بنتها قطة مغمضة ومتعرفش أى حاجة والبنت عامله فيها عبيطة وبعدين يادكتور شريف البنت فاضل على فرحها يادوب يومين أستر علينا ربنا يسترك ويقوم الدكتور الغير شريف أصلا بعمل اللأزم وتعود البنت صاغ سليم وشريفة وعفيفة وتمر ليلة الدخلة بسلام وصاحبنا قليل الخبرة والحيلة لم يكتشف الملعوب وينام وهو على أمره مغلوب وبعد مرور شهر العسل يخرج للعمل العريس الغير مرغوب ويدخل عليها الشاب المحبوب ويعيشون دنياهم حتى الغروب وتنسى بسلامتها تأخذ الحبوب ويقع المحظور والمكتوب . اللى مفيش منه هروب .. وتخلف بدل العيل جروب .. ويختلط الحابل بالنابل ونرجع نقول يا وقعة بنى .
10-
الكذب الأسود ** وهو أسود أنواع الكذب خطورة بمعنى أنه يكون بقصد الوقيعة والفتنة بين طرفين مما تؤدى الى القتل ولذا فأن الفتنة أشد من القتل وفى سياق الموضوع تجد أن الست جيجى تستمر فى سيرها البطال وتكتب الأولاد بأسم زوجها طبعا سى السيد بطل الأبطال اللى شغال عمال على بطال فى حين أنه ليس أبيه الحقيقى وربما كان أبيه الحقيقى له أبناء أخرين وبذلك يتزوج الولد من أخته دون أن يدرى كل منهما بحقيقة الأخر وتخلف جيجى أمها مع بناتها علشان تبعا سعادتك عارف أنك لما تقلب القدرة على فمها تطلع البنت لأمها
وتدور عجلة الحياة ويزداد الكذب سوادا وتزداد القلوب عتمة وظلام حالك والعياذ بالله وذلك كله لأننا تهاونا فى البداية وعلمنا أولادنا أن دى كذبة بيضاء ما فيهاش حاجة ولكنها قد أوصلتنا الى السواد كله والى الكفر والعياذ بالله . وحسبنا الله ونعم الوكيل
الرئيسية 
الثلاثاء مارس 16, 2010 1:55 am
كل واحد بيكدب بالعشر الوان دول والحمد لله ربنا يهديكوا قولوا امين 